اول موضوع ليه على المدونه
يمكن يكون غريب و افكاره مش مرتبه و يمكن محدش يرد خالص
يمكن يكون غريب و افكاره مش مرتبه و يمكن محدش يرد خالص
بس حبيت اكتبه و خلاص
موضوع بيري الجديد في المدونه بتاعتهم (أحلى اصحاب) خلاني افكر في الموضوع ده
الذكريات دي اجمل حاجه في الدنيا
هيا اللي بتصبرنا على الفراق و البعد عن الناس اللي بنحبهم
فيه مشكله ممكن تكون عندي انا بس مش عارفه
اني ساعات موضوع الذكريات ده بيتطور معايا لدرجة اني بعيش معاها هيه بس
يعني بيبقى بايدي اني اكسر حاجز البعد ده بس مش عارفه ليه بحب اعيش مع الذكريات الجميله
اعيش مع التفاصيل و الاماكن و كأن الاشخاص دول لسه حوليه و معايا و لسه عايشين في نفس الفتره اللي وقفت فيها الذكريات
يمكن خوف ان الشخصيه اللي ليها ذكريات معايا دي تكون اتغيرت سواء في التصرفات او الافكار او حتى عاطفتها نحيتي
بخاف اوي اكلم مثلا واحده صحبتي لانها وحشاني القيني مش هماها زي ما هيه هماني
اشوف واحده مشفتهاش من زمان و وحشاني اوي مرضاش اسلم عليها افرضي طلعت مش فكراني اصلا يبقى ساعتها منظري ايه
يعني حاجات كده بتخليني اعيش مع ذكرياتي بس و الغريب انها ساعات بتغني عن اني اعيش مع الاشخاص دي في الحقيقه او اتكلم معاهم
ممكن كمان ارسملهم حياه وهميه من دماغي زي ما انا عايزاها تكون و ابقى فرحانه بيها اوي
في حاله تانيه خوف مثلا ان الحد اللي بحبه اوي ده يكون شخصيه تانيه متمشيش مع شخصيتي و معرفش اتعامل معاها
و مع ذلك ساعات بتصدم في بعض شخصيات عرفت شخصيتها الحقيقيه بعد فتره من الاوهام و التخيلات اللي برسمها و مع ذلك برضه مش بعرف ابطل رسم و تخيل
تفتكروا ده ليه هروب من الواقع ولا خوف من نفسي و عدم ثقه فيها و لا عدم ثقه في الاخرين
بفكر كتير في الموضوع ده و نفسي حد يفكر معايا
انا ليه بعمل كده و هل انا لوحدي اللي كده ولا حد بيحصله اللي بيحصلي ده ؟
_______________
Wild Flower
7 comments:
انا زيك بالظبط
بعيش كتير قوى فى الخيال بتاعى
لدرجة ان اصحابى لما كلمتهم عن حاجات فى خيالى قالوا انى مجنونه بجد
بهرب كتير من الواقع
و بتخيل حاجات كتير قوى
يعنى بكون بعيط لفراق ناس و فجأه اتخيلهم بيضحكوا افضل اضحك و انا بعيط
او اتخيل لحظه و مثلا افتكر ان الشخص ده قال شئ اروح انا رافعه صوتى و اقول كلام تانى علشان اصلح الموقف اللى كان هيحصل بس بلاقى فى الاخر ان كل ده وهم
و بجد انا بتخيل حاجات كتير
ده انا مجنونه بطريقه رهيبه
و فى التخيل فظيعه
لدرجة انى بعيش مع ابطال الروايات اللى بقراها و احذرهم مثلا من اللى بيحصل و اكلم اصحابى عنهم اقولهم مثلا نور هيساعدنى فى ده و سلوى هتعملى كذا و رمزى هيعمل دى لدرجة انهم اتجننوا منى
احمدى ربنا على اللى انتى فيه
انا بجد بقت معظم حياتى خيال
بقيت خايفه اصحى مره الاقينى مش انا و حياتى كلها خيال فى خيال
شرف بجد كبير ليا ان موضوع ليا يفكرك بالموضوع بتاعك
انا بيتهيالى كتير من الناس بيعمل ولو اجزاء من التعايش الغير حقيقى او بمعنى اخر الخيالى اللى انتى بتتكلمى عنه
على فكره هو بجد كتير بيبقى حاجه تفرح بس المشكله بقى لو تماديتى فى الحكايه وفى الاخر تتصدمى فى الواقع.. ناس كتير حصلهم كدا وده بياثر جدا على نفسيتهم بجد
انتى ممكن تستغلى حكاية الخيال دى فى كتابة قصص او خواطر على فكره
هتستفيدى بجد منها لانك ساعتها هتقدرى تحددى انها فعلا مجرد خيال ومالوش تاثير حاد عللى حياتك
طولت انا ..بس بجد الفكرة حلوه اوى وشدتنى
استمرى ياجميل
احب اطمنك ان تلت تربع الشعب كده:D
بتهيالى فى ناس كتيره كده بترسم فى خيالها كتير شخصيات كتير وانا كنت هاتمادى فى الموضوع ده وكان هايبدا يأثر فى شخصيتى الاجتماعيه بجد وكنت بدأت احس ان بعدت عن الناس واسكت وماتكلمش مع حد
بس الحمد لله لحقت نفسى قبل ماادخل فى المرحله دى
بس اظن ان عيوب الحكايه دى اكتر من مميزاتها
لان بجد الواحد لو ساب نفسه وتعايش فى الذكريات دى هاتأثر اجتماعيا بالسلب عليه
_______
منوره يا منار وربنا :*
نورتى البلوج اخيرا ...... موضوعك تحفة بجد
هو فعلا بتحصل مع معظمنا دا اذا ماكنش الكل
الاصعب من الزكريات نفسها انك تتعايشى معاها
انك فى كل لحظة وانتى بترسمى فى خيالك كل ده تفتكرى انه فعلا خيال وانك بتوهمى نفسك بكدة مع كل لحظة عارفة ان كل ده مش حقيقى ومع كدة بتستمرى فيه ....... كنت قولت فى ردى على راوية كلمة الخلود لناس فى حياتك بسبب زكرياتهم معاكى وانك لمجرد عدم نسيانهم ده ميزة بتديهاليهم دونا عن كل اللى قابلتيهم وصادفتيهم فى حياتك ........ نتفتكرى بيحبوا ايه وبكرهوا ايه وايه اللى بضايقهم وازاى كنتم بتتعاملوا مع بعض ........ كل انسان خالد بطريقة ما فى حياة غيره ...... اصحابك اهلك جيرانك او اى كان ....... بجد دى حاجة مش بتسبب السعادة على قد مابتسبب التعاسة لانك بتتمنى الف مرة ان ايامك معاهم ترجع تانى ........ ولا لما تقابليهم بقى زى مابتقولك مطر من الاسئلة اللى مالهاش اجوبة ولو حاولتى تتقربى منهم علشان الاجوبة دى يااما الصدمة يااما مش فاكرينك اصلا يااما فرحك لما يكون عندهم نفس اللى عندك وبردو فاكرينك ........ احيانا تمنعك خوفك من الصدمة السؤال او الاحراج وتفضلى بعيد وياسلام بقى لو نفس الموقف عند الطرف الاخر ويتبقى الصمت وعدم اتخاذ خطوة للامام ....... ماتيجوا األف ليكم فيلم احسن ههههههه
ماعلينا موضوعك انتى وراوية بجد تحفة تسلم افكاركم
اولا الحمد لله انها عجبتكوا كنت خايفه متعجبش حد :)
****************
روان
كويس اني لقيت حد زيي بس انا مش اوي كده
بالنسبه لموضوع التقمص ده كان خد فتره كده برضه و خلص الحمد لله
بس متهيئلي ان صعب اوي انك تتعايشي مع الخيال للدرجه دي
حاولي تعيشي مع اشخاص واقعين شويه يمكن تلاقي اللي بتدوري عليه في الخيال
منوراني يا جميل و واضح انك شخصيه رقيقه :)
*****************
روره
هيه فكره حلوه موضوع الاستفاده من الخيال دي
بس فيه مشكله تانيه اني مش بحب اشارك مشاعري مع حد
ممكن اشارك افكاري شويه لكن الاحاسيس و الخواطر وكده صعب
بس هحاول اكتب مع نفسي كده يعني اشارك نفسي بقى في احاسيسي :D
******************
ميمو ملاك حاسبات :)
منوره بوجودك و وجودنا كلنا مع بعض :*
فعلا عندك حق وانا ساعات بيحصلي كده فعلا واحب اقعد لوحدي ومكلمش حد وبدأت تأثر عليا اجتماعيا
بس بحاول اطلع نفسي من الحاله دي شويه
ربنا يستر بقى و أقدر اسيطر عليها
******************
نسومه
اه شفتي بقى بس هوه كان منور اصلا من قبل ما أجي
صح جدا فعلا صعب اني انسى اي حد دخل حياتي و لو لفتره بسيطه و بيفضل فيه ذكرى و لو صغنونه
حتى لو تصرفاتي بتدل عكس ده
الموضوع مش بيبقى بالسهوله انك تبقي متأكده انه وهم فتطلعي منه
بس تصدقي هيبقى صعب اوي لو كل واحد مستني التاني هوه اللي ياخد الخطوه الاولى احسن يحرجه
تفتكري دي حلها ايه؟
يلا هيبقى فيلم حلو اوي و هيكسر الدنيا ههههه
ربنا يخليكوا يا بناتيت رفعتوا روحي المعدنيه :)
فمابالك بقى باللى عمره كله ذكريااااات
انا داايما بعيش الذكرياات
هيا الذكرياات حاجات جميله
حتى بمرها
بس متهيألى الصح اننا نعيش اليوم ونحاول ننسى الذكريات ؟؟؟؟؟؟
SimbaGirl
هوه صعب فعلا ان الواحد يعيش عمره كله في ذكريات
الذكرايات احساسها حلو و كل حاجه خصوصا لو سعيده
مش ضروري اننا ننساها خالص
بس لازم يبقى فيه فتره للواقع نتعايش معاه
نورتيني :)
إرسال تعليق