أرجوك انصت الينا
حافظ على صحتك و صحة من تحب
و كن قدوه حسنه لأولادك
ولا تترك نفسك تحت رحمة الخطر ليتحكم بك
لا تزول قدما عبد يوم القيامة حتى يسأل عن عمره فيما أفناه وعن علمه فيم فعل وعن ماله من أين اكتسبه وفيم أنفقه وعن جسمه فيم أبلاه
اول موضوع ليه على المدونه
يمكن يكون غريب و افكاره مش مرتبه و يمكن محدش يرد خالص
بس حبيت اكتبه و خلاص
موضوع بيري الجديد في المدونه بتاعتهم (أحلى اصحاب) خلاني افكر في الموضوع ده
الذكريات دي اجمل حاجه في الدنيا
هيا اللي بتصبرنا على الفراق و البعد عن الناس اللي بنحبهم
فيه مشكله ممكن تكون عندي انا بس مش عارفه
اني ساعات موضوع الذكريات ده بيتطور معايا لدرجة اني بعيش معاها هيه بس
يعني بيبقى بايدي اني اكسر حاجز البعد ده بس مش عارفه ليه بحب اعيش مع الذكريات الجميله
اعيش مع التفاصيل و الاماكن و كأن الاشخاص دول لسه حوليه و معايا و لسه عايشين في نفس الفتره اللي وقفت فيها الذكريات
يمكن خوف ان الشخصيه اللي ليها ذكريات معايا دي تكون اتغيرت سواء في التصرفات او الافكار او حتى عاطفتها نحيتي
بخاف اوي اكلم مثلا واحده صحبتي لانها وحشاني القيني مش هماها زي ما هيه هماني
اشوف واحده مشفتهاش من زمان و وحشاني اوي مرضاش اسلم عليها افرضي طلعت مش فكراني اصلا يبقى ساعتها منظري ايه
يعني حاجات كده بتخليني اعيش مع ذكرياتي بس و الغريب انها ساعات بتغني عن اني اعيش مع الاشخاص دي في الحقيقه او اتكلم معاهم
ممكن كمان ارسملهم حياه وهميه من دماغي زي ما انا عايزاها تكون و ابقى فرحانه بيها اوي
في حاله تانيه خوف مثلا ان الحد اللي بحبه اوي ده يكون شخصيه تانيه متمشيش مع شخصيتي و معرفش اتعامل معاها
و مع ذلك ساعات بتصدم في بعض شخصيات عرفت شخصيتها الحقيقيه بعد فتره من الاوهام و التخيلات اللي برسمها و مع ذلك برضه مش بعرف ابطل رسم و تخيل
تفتكروا ده ليه هروب من الواقع ولا خوف من نفسي و عدم ثقه فيها و لا عدم ثقه في الاخرين
بفكر كتير في الموضوع ده و نفسي حد يفكر معايا
انا ليه بعمل كده و هل انا لوحدي اللي كده ولا حد بيحصله اللي بيحصلي ده ؟
_______________
Wild Flower
3:21 PM |
Category:
emotions,
ta7yeeeeeeees,
مواقف
|
السلام عليكم ورحمه الله وبركاته
ازيكم يا ال حاسبات
طبعا العنوان غريب اووووى
بس انا قصدته بصراحه !!
هنتكلم فى نقطه مهمه اوووى جداا
بما اننا هنا بنات حاسبات
يعنى هنكون فى يوم امهات المستقبل
طب ياترى هتربى بنتك ازاى ؟؟؟
الرد السريع زى ما انا اتربيت ؟؟؟
طب وانتى اتربيتى ازاى ؟؟
هتبلم شويه وبعدين هتقول على القيم والمبادىء
طب انا بجد مقصدش كده ؟؟؟
انا اقصد هتربى بنتك على انها بنت ولا راجل ؟؟
انا بتكلم عن تجربه عشتها
انا اتربيت على انى رااجل
اتعلمت رياضه عنف اتعلمت كاراتيه ؟
رياضه أثرت فيا كتير فى طباعى وتفكيرى للاسف
بقيت جريئه زياده اووى
وبتعامل اوقات كتير على انى ولد
حتى كنت بلبس لبس ولاد
لحد ما اتغيرت
اه التزمت فى لبسى والى حد ما هديت شويه
لكن كل شويه بسأل نفسى
هوا انتى لو اتحطيتى فى موقف صعب كأم هتتصرفى على اساس انك أم ولا أب؟؟
بجد مش عارفه
انا عن نفسى رغم انى الى حد كبير مقتنعه بتربيتى وبالظروف اللى جت فيها
لانى الاخت الكبيره وكلنا بنات ومعندناش أخ ولد
الا انى معتقدش انى هربى بنتى على انها رااجل
انا هربيها على انها بنوته ولكنها بنت جدعه
تتصرف برجوله
ولكنها مش رااااااااااااااجل
أتمنى انى اشوف ردود تفهمنى اذا كنت انا صح ولا غلط؟؟
____________
SimbaGirl
Eman
3:20 AM |
Category:
قضايا معاصره
|
السلام عليكم ورحمه الله وبركاته
النهارده أوباما زار مصر
اه زرانا وكانت الاجراءات الامنيه مشدده جدااا
غير مسبوقه!!!!!
بس عامه مش مهم احنا لازم نكون بلد الامن والامان ونحافظ على ضيوفنا حتى ولو على حساب حرياتنا الشخصيه ؟؟
نااس تؤمر باغلاق محلاتها التجاريه ؟
وطلبه يتشدد الامن فى دخولهم لجامعتهم ؟؟ يلااا عجبى !!!
زار مسجد السلطان حسن هو وهيلارى كيلنتون
المهم أوباما قاال كلام كتير فى خطابه
استشهد ببعض أياات القران الكريم
واتكلم عن الاسلام بصوره متحضره وجميله جداا طريقه غير معهوده من الرؤساء الاجانب وخاصه الامريكان ؟
وعد بدوله فلسطينيه دون المساس بالكياان الصهيونى ؟
ودى أول نقطه اعترض عليها
ازاى نرضى بنص حقنا ؟؟
الارض الفلسطينيه ملك لأهالى فلسطين ؟
ومينفعش انها تتقسم بينا وبينهم ولا هو مبدأ الارض مقابل السلااام ؟؟؟؟؟؟؟؟
نيجى لنقطه مهمه اوووى
موضوع السلاح النووى
قال ان السلاح النووى بيهدد أمن الدول ؟؟
طبعا يقصد ايران !!!
فما بالكم باسرائيل التى تمتلك الكثير من الاسلحه النوويه بل وأحدثها ؟
دى بقى مش بتمثل خطر علينا كعرب ؟؟؟؟
طبعا أنا رأيى ان ده مجرد تخدير بس لينا ؟
وائل النبراشى قال أوهام أم أحلام ؟؟
ايه رأيك انت فى خطاب أوباما للعالم الاسلامى؟؟؟
______________________
SimbaGirl
Eman
9:49 AM |
Category:
قضايا معاصره
|
السلام عليكم ورحمه الله وبركاته
النهارده انا داخله اتكلم عن موضوع مهم اوووى
"التعصب"
التعصب فى التعامل
التعصب فى الدين
التعصب فى حياتك نفسها
التعصب فى الكوره
التعصب فى كل شىء
اولا التعصب معناه من الاخر ومن وجهه نظرى التشدد فى اتجاه الاشياء وعدم النظر لوجهات النظر الاخرى
من الاخر رأيك هوا اللى صح واللى مش معاك يبقى ضدك
التعصب ده مخلينا ارهابيين قدام العالم كله
يعنى وبجد السبب اللى لقيته مخلى صورتنا وحشه كعرب قدام العالم هوا التعصب
ما ايام الرسول المسلمين كانوا ملتزمين بس مش متعصبين
ودى النقطه الفيصل فى موضوع التعصب
ثانيا ليه تكون متعصب ؟
ايه وجه الاستفاده من كونك بنى ادم جامد
مش بترضى بكتير من وجهات النظر الاخرى
يعنى الاهلاوى لازم يكره الاسمعلاوى!!!!
طب ليه ؟؟
كل واحد يشجع فريقه من غير ما يتعرض للتانى
طب ما انا اهلاويه واهلاويه صميمه جدااا
بس من غير تعصب ولما الزمالك بيلعب باسم مصر لازم اشجعه مفرحش فى هزيمته لانه فى الاخر فريق مصرى
دى حاجات بسيطه عن التعصب
انا جيت اسئل ليه احنا من جوانا متعصبين ؟
ليه منغيرش من ده علشان نحسن صورتنا قدام العالم
وياااريت لو حد عنده حلول سريعه وفعاله لموضوع التعصب يقولها؟
بس
يلا سلامى للجميع
______________________
SimbaGirl
Eman
8:31 AM |
Category:
قضايا معاصره
|
Posts
