الاشتياق و القدر

اكتشفت انه كلما ازداد اشتياقها اليهم و حنينها لرؤياهم

خرج بعضهم من ذاكرتها لينطلقوا الى الفضاء الرحب حولها

فتستقر ملامحهم هادئه على وجوه اناس لم تعرفهم من قبل

فتنظر اليهم باشتياق و تحاول التأكد انهم مازالوا معها لم يبتعدوا الى الابد

او على اقل تقدير انها لن تراهم الا كلما حنوا هم اليها

وفجأه تختفي ملامحهم و يظهر من خلفها ملامح لاشخاص اخرين

فتتلاشى ابتسامتها و يحل مكانها الارتباك و الحيرة ...و تواصل انطلاقها الى مبتغاها

تتكرر الاحداث معها فتتسائل ماذا يحدث...؟

اهو الاشتياق الى هذا الحد...

ام انها ايدي القدر الخفيه تتلاعب بحياتها مرة ثانية

"""""""""""""""""""""""

عاودها احساسيس الحنين الى الماضي فذهبت لتبحث عنه فلم تجده .......
فأحست ان ماضيها بكل ذكرياته و شخصياته اصبح جزء من حاضر شخص أخر !!!

HappY 3eed

كل سنه وإنتوا بألف خير يارب

عيد سعيد عليكوا إن شاء الله :)

۩ RamDan MooBark ۩

احم احم

ازيكم يا زوار البلوج المهجور

تحت شعار نضف بلوجك عناكبه كترت  هانضيف البوست ده بعد مرور 265

يوم على اخر بوست 

 ۩  ۩  كل سنه وانتوا طيبين رمضان مبارك عليكم ان شاء الله ۩  ۩ 

وربنا يتقبل منا ويجعلنا من عتقائه بأذن الله

۩  ۩  ۩

قولوا امين

دعاء ما قبل التخرج


اللهم اعنا على ذكرك وشكرك وحسن عبادتك
اللهم افتح بيننا وبين الناس بالحق
اللهم احسن خواتيم اعمالنا
و اغفر لنا ذنوبنا سرها وعلنها ..عمدها وسهوها

اللهم هون علنا المشاق .. واجمعنا دائما علي خير
في حبك وعلى ذكرك وطاعتك
مسلمات طائعات .. من خير ركائز امتك اينما ذهبوا

و صلي اللهم وسلم على خاتم المرسلين سيدنا محمد وعلى اله وصحبه اجمعين

آمين

اهو الى لقاء ام وداعا

شخصيات احبتها و عاشت معها .. خيالا اكثر من حقيقه كعادتها
تنتظر اليوم تلو الاخر ليأتي يوم اللقاء لتأنس بهم
تلتقي بهم و تنظر اليهم و تضحك لضحكهم و تتلهف لمعرفة اخبارهم
يكفيها فقط و جودها معهم في نفس المكان حتى و لو لم تشاركهم الحديث
يكفيها سلامها عليهم أو لمحها شوقهم لها كما تشتاق هي اليهم
و لكن اقترب ما لم تكن ترده يوما .... نعم بدأت تشعر به في جلساتها الاخيره معهم
أصبحت معهم في عالمها في خيالاتها تراهم امامها و تتذكر ايامها معهم و كانها بعيده كل البعد
تجلس بعيدا و تنظر الى وجوههم .. ضحكاتهم و همساتهم ... بل الى كل تفصيله منهم لتختزنها جيدا
تشعر احيانا انها لا تريد ما يقطع عليها تأملاتها بهم .... حتى هم انفسهم !!!
تعد جيدا عدتها من الذكريات ... تحفظها في اماكنها الخاصه لتستعيدها وقت احتياجها اليهم
لم تحسب يوما حساب هذا القادم مع اعتيادها عليه و لكنها لم ترد ان تضعه في الحسبان
ولكنه قادم لا محاله .... ها هو تراه يتقدم يتقدم و .... يتقدم اكثر منها يريد جذبها بعيدا بعيدا عنهم
تنظر اليهم و هي تقاوم ... تبكي و تضحك في ان واحد .... تنطلق كلماتها هامسه اهو الى لقاء ام ... وداااعا

مملكه الثلج المشمس

أشتاق اليك دائما ......

و أعجز عن نصر شوقى ..

ولكن فى هذه الليله اشتاق اليك بجنون !!

فقد زاد شوقى عندما رأيت القمر يتأرجح على صفحان المياه فتذكرت حالى معك ؟!

زاد شوقى وسط سقوط مملكه الربيع و تعيين مملكه الشتاء التى فرضت قوانين البرد والخوف ...

ازداد حوفى عليك ...

ازداد عندما رأيت قطع الجليد تهطل بغزاره من السماء وتتساقط على سطح الماء وتحطم القمر الى أجزاء و أجزاء ....

ازداد خوفى من أن أصبح سراب بعد الشتاء !!

ازداد خوفى من أن يجمد برد و خوف الشتاء حبك لى ..

ازددت خوفا من المجهول !!

ازداد خوفى عندما رأيت النجوم تلمع وسط حصار ضبابى !!

ازددت ألما وسط وحشه الماء التى لا يكسر ظلمتها الا ضوء القمر ...

ازداد ألمى من أن تمطر السماء معلنه فصل دموع الوداع ...

وفى وسط أجزانى و ألامى وخوفى ...

ها أنا أغمض عينى ...

لأحلم بعصر الحب ...

عصرى معك يا أمير .....

الصيف ... فى جرأتك

الربيع ... فى جمالك وبهائك

الخريف .... فى غموضك

الشتاء .... فى بعدك وغضبك

عصرى معك يا أمير الفصول الاربعه

لا ... يا أمير مملكه الثلج المشمس

الحياة من غير مجازفات ملهاش طعم

السلام عليكم ورحمة الله وبركاته

حد جرب يستمتع بمشاكله ؟؟؟؟ حاجة غريبة صح ؟؟؟
طب حد جرب يجيب لنفسه المشاكل علشان يستمتع بيها . من باب التغيير مش اكتر ..... حاجة اغرب

اليومين اللى فاتوا من بعد الامتحانات بداية الاجازة بمعنى اصح الصراحة مكنتش عارفة اعديهم ازاى
او مممم كانوا صعاب جدا ومازالوا بالنسبة لى
لانى مش بحب اكون فاضية او ماوراييش حاجة او فى اجازة من حاجات متعودة عليها وحبيتها
وربنا يستر لما اتخرج هايكون ايه وضعى ...... الحقيقة ورايا حاجات بس ماعنديش استعداد كافى انى اكملها او انفذها

امبارح من باب التغيير نزلت المنصورة لحضور ورك شوب فى شركة ....... حاجة عادية مش مستاهلة انى اكلم عنها
لكن تفاصيلها وتحليلى لليوم كله بعد ماروحت خلانى مبتسمة وفرحانة اكتر من اللازم بانت عليا انها شئ مش طبيعى

الحكاية وما فيها ان قدامى اختيارات كتيرة فى اليوم ده وكنت معظم الوقت على غير العادة اختار الاختيار الاقل فى الترجيح
او نسبته اقل فى التنفيذ ......... كونك تختارى بين امرين وتختارى الاقل فى النسبة ده بيبقى مجازفة بينتج عنها خساير
الخساير مش شرط تكون فادحة اقصد ان ممكن يكون منها خسارة فى الوقت وتضييعه انك ماتستفاديش حاجة من الحركة دى
كدة يعنى

من ضمن المجازفات هى حضور الورك شوب نفسه
-البنت اللى كانت هاتروح معايا ظروفها ماسمحتش ونتج عنها مكالمة معظمها بهدف اقناعى انى كمان مااروحش
علشان لوحدى وده ممكن يحسسها بالذنب ........ المهم اقنعتها بانى متعودة على كدة وانى احتمال كبير الاقى بنات اعرفهم هناك
كانت نسبة احتمال وجودهم هناك ضعيفة اكيد بس ماقولتش وصممت انى اروح
- حاجة تانية اخدت راى بنت كانت راحت قبل كدة رايها هبط من عزيمتى شوية بس بردو اخدت قرار انى اروح لان رايها كان مختلف عن راى ليها قبل كدة والطبيعى عندى انى اخد الاراء لو مااقتنعتش بيها اوى اجرب بنفسى واكون حاطة فى الحسبان كل الاحتمالات
- حاجة تالتة ان اختى كانت هاتيجى عندنا فى اليوم ده واحتمال كبير انى لما ارجع الاقيها مشيت وطبعا ابراهيم ابن اختى عندنا الكل هايحب يكون موجود وقبلهم انا (كان ليها بديل انى فى اليوم اللى بعده اروح لها )
- حاجة رابعة انى ووالدتى متفقين نعمل حاجة اليوم ده وهى اجلتها لما قولتلها على الوضع عادة فى البيت مرنيين معايا فى اى خروج
مافيش مشاكل الحمد لله
- الحاجة الخامسة انى اروح لواحدى واجى لواحدى المرواح مافيهوش مشاكل مع انه كمان كان فيه احتمالات اختيار(اقصد طريقة السفر نفسها )
لكن لما اروح فيها سفر والليل هايكون دخل وهاكون لواحدى ومع كدة رحت بردو
- حاجة كمان ممكن الورك شوب ده مش على مستوى ومايستحقش انى اهمل كل اللى فات وانى احضره

ده على سبيل المثال

مثال كمان انى رحت متاخرة الورك شوب نتيجة لاختيار بين امرين بردو عامة الطبيعى بيبدا متاخر على مالناس تيجى
كان موصوفلى المكان بطريقة اخدتها فى تخيلى غلط لكن سؤالى لناس هناك اغنانى انى اتوه فى بلد زى المنصورة ماعرفش امكاكنها كويس

مثال تانى وانا فى المرواح اتحطيط فى اختيار ادى بيا انى تهت (ليل الى حد ما لواحدى ومش عارفة انا فين .... الكلام ده جوة المحلة اكيد )
ومع كدة كنت مستمتعة لانى كنت بتفرج على الامكان اللى مش عارفاها وبطبيعة الحال انا من المحلة ولا كانى منها ولا اعرفها

الكلام ده استمتعت بيه لاسباب اولا كان معايا فلوس كفاية وعاملة حسابى وعلى اتصال بيهم فى البيت على سبيل انى اطمنهم يعنى
المجازفات اللى بتتاخد بتكون فى اطار صغير اقصد ماتوديش بيها الى التهلكة منها ممنوع ركوب تاكسى مثلا المواصلات العادية امان اكتر
اه بالنسبة للمرواح لواحدى كانت الحمد لله محلولة لانى لاقيت هناك بنتين من المحلة من هندسة اتعرفت عليهم كانوا فى سركيس
والكورس كان تمام واستفدت منه جامد الحمد لله وده فيه نقطة عامة انا من النوع اللى مش بجرى ورا المعلومة الا لما احتاجها او يكون عندى فضول بخصوصها وده شئ بشع
ماانصحش اى حد بيه عامة انا مش بحب القراية اوى واكيد ده مش مرغوب او مش كويس وعيب فادح جدا
اه كمان اختى ماجتش اصلا والمفروض انها اجلته وهاتيجى النهاردة ان شاء الله

هى كلمة بس عاوزة انهى بها الرغى ده ............. مافيش احسن من انك تستمتعى بوقتك وماتسمحيش لحاجة انها تضايقك
الى حد ما حاسة ان الموضوع فيه مغامرة شوية بس عجبنى جدا

سلام ....... واشوفكم على خير ان شاء الله

تنويه صغنون :D

تنويه صغنون اووى
انا غيرت البلوج بتاعى :D
بدل
SimbaGirl
الى
يوميات ملكه بلا عرش
هنا

مبروووووووووووووووك لمصر

السلام عليكم ورحمه الله وبركاته
بقالى زماان ماكتبتش هنا ...
بس انا شايفه ان المكان اللى يستحق الكتابه فيه النهارده هوا هنا ......
هنا روح الاخوه والحب وحاجات كتير جميله ...
هنا بيكتب أجمل بنات فى الدنيا ... بنات حاسوباتيه مصريين ...

مش هطول عليكم ...
بس مبروووووووووووووووووووووك لمصر على فوزها الغالى على الكاميرون

يمكن بدرى اوووى اننا نحتفل ...
لكن انا بحتفل لاننا هنقابل الجزائر !!
هناخد حقنا فى الملعب ...
من غير مطاوى ولا سكاكين ....
راجل لراجل ....
11 لاعب ل 11 لاعب ....
من غير دم ولا عنف ....
هنرد كرامه المصريين ....

هيا مش حرب ........
لكن رد كرااامه ...
رد كرامه لشعب اتهان واضرب .....

بجد بجد ....
أتمنى أن مصر تلقن الجزائر أكبر درس فى حياتها ....

وعلشان نقول .........

هــــــــــــــــــــمـــــــــــــــــــــا دووووووووووووووول المصـــــــــــــــــــريين

أجدع شعب وأحسن نااااااااس

فضفضه... غريبه شويه!!!!

معرفش الكلام ده ينفع اقوله هنا ولا لا بما انها مدونتنا كلنا
بس انا هقوله وخلاص مجرد فضفضه
ولو اني مبفضلهاش بس حاسه اني مجرد عايزه ادي ايحاء لنفسي اني بتكلم وحد سمعني
بس قبل ما اتكلم مش عايزه حد يدخل يجاملني مجرد مجامله لاني شبعت من المجاملات و يمكن ده اللي تاعبني
حاسه اني مبقتش بعرف اتكلم صح و معنتش بعرف افهم صح
كل ما اجي اضبط حاجه ابوظها و كل ما اجي اختار طريق يطلع غلط
NO ONE LOVES ME NO ONE NEEDS ME & NO ONE CARES
كل اما اقرب من حد قوي لازم يحصل مشاكل
و كل ما اقول معنتش هخلي حد يبقى قريب مني تاني بيحصل العكس
بقيت حاسه اني انا اللي غلط كلي على بعضي كده
بقيت بتحط في مواقف عمري في حياتي متخيلت اني اتحط فيها و لا اتمنيت
ساعات احس ان اللي حواليا بيحبوني و ساعات احس انها مجرد تهيئات
واحس اني مفياش حاجه تتحب اصلا وان الناس كلها بعيده عني
اقرب صحباتي مش فاهمني ولا انا اللي مبقتش بفهمهم انا مش عارفه بجد
بقيت حاسه اني كل اللي بيحصل حواليا ده مجرد اوهام انا اللي رسماها و ان مفيهاش اي حاجه حقيقيه
اول مره في حياتي الاقي كمية مشاكل كبيره تنزل على دماغي في وقت واحد
وكل شويه احس اني زعلت حد مني وانا مش فاهمه انا عملت ايه
اختفي واظهر و لا فارق ومحدش بيسال عني غير قليل جدا
يمكن انا مبعرفش ابين اهتمامي بالكلام لاني ليا افكار خاصه بس ده مش معناه اني مش مهتمه
و يمكن دي كانت نقطة الخلاف الاصليه بيني و بين اي حد من صحباتي
فقررت ابعد على قد ما اقدر عن الناس لحد ما ارجع افهم نفسي تاني ماشيه ازاي
بس حسيت اني بعدت اووووي عن ناس كتير و قصرت مع ناس اكتر
مش بقولوكوا ملخبطه
انا مبحبش اكتئب و مبحبش المشاكل و كل ده جه في وقت واحد
المشكله ان الاحساس ده جاي مش في وقته خالص
ادعولي ربنا يهديني و افوق منه بسرعه عشان الموضوع معدش ناقص

ملحوظه مهمه اسفه اني مش بكتب غير حزين بس
بس هوه ده اللي بعرف اعبر عنه مش عارفه ليه
مع اني الحمد لله عندي ايام سعيده برضه بس بحسها حاجه خاصه بيا لوحدي و مش بعرف اعبر عنها
واسفه لو كنت ضايقت او جرحت اي حد بقصد او بدون قصد و اسفه لويعني حد يعني فكر انه يرد و مقدرتش ارد عليه

ملحوظه اخرى : اول مره احس اني تفكيري تافه كده و اني مبعرفش اتصرف!!!!!

اه قبل ما انسى متخافوش مش هوجع دماغكوا تاني بالاكتئاب ده لاجل غير مسمى ولا مسمى مش هتفرق كتير

حاجه مهمه اويييييييييي
الف مبروووك لدفعة 2009 على حفلة التخرج كانت حفله جميله جدا
لولا المشاكل اللي انا فيها و اللي حصلت في اليوم ده كان هيبقى اسعد يوم في حياتي

السلام عليكم في امان الله استودعكم الله الذي لاتضيع ودائعه

اه صحيح ... مش هاتصوتوا ولا ايه ؟؟؟؟؟؟؟؟؟!!!!!!!!!

السلام عليكم ورحمة الله وبركاته

الموضوعين بينهم فترة زمنية صغيرة بس بجد الموضوع ده مهتمة بيه من فترة وشاغلنى
ولاقيت صاحبتى ذكرته بردو وكان على بالها فكان حاجة كويسة اننا مهتمين بنفس الحاجة
طبعا انا مااقصدش اننا نصوت بمعنى نصوت
لا اقصد يكون عندنا بطاقات انتخابية ونشترك فى التصويتات فى الانتخابات
الموضوع معرفش غريب ولالا بس بجد عاوزة اعرف ايه اللى المفروض اعمله علشان اخد الخطوة دى

اقصد من سن كام والبطاقة دى تتعمل فين وايه المطلوب علشان نعملها ورسومها المطلوبة
طبعا انا سالت هنا فى البيت وجميعهم بلا استثناء مش مهتمين بالنقطة دى على اساس يعنى انه مافيش منها امل ولا نتيجة
لما اتعرض الموضوع قدامى من صاحبتى شجعتنى اكتر انى افكر فيه
هى كمان سالت عندهم قالولها تروح القسم ^_^ طبعا انا مش فاهمة يعنى ايه نروح القسم اللى تقريبا عمرنا مادخلناه
ولو حصل لانى طبعا قولتلها خلاص نبقى نروح مع بعض ونعمل المطلوب لانها معايا فى نفس البلد
هانروح نقولهم ايه عاوزين نصوت ؟؟؟

طبعا مافيش اعتراض ان كلنا نصوت بس هانصوت على مين بقى دى المشكلة
لما بعدى واشوف اعلانات الناس اللى هانصوت ليها مش عارفة ولا واحد فيهم ولا عملوا ايه ولا صفاتهم ايه
حتى تقسيماتهم نفسها اقصد تبع حزب معين ولا لا كدة يعنى

الموضوع بالرغم انى حاسة انه اكبر منى شوية بس بجد يستحق التجربة
وكمان ده اللى المفروض يتعمل حتى من باب اننا نكون عملنا اللى علينا

ها مش هاتصوتوا ولا ايه ؟؟؟؟ حد عارف يصوت ازاى ^_^

فى امان الله

خمسة تقنية ..

السلام عليكم ورحمة الله و بركاته

وحشتوني جدا

كالعادة حبيت احط اضافة تقنية
موقع http://www.slidefinder.net/
للناس اللي بتحب تعمل ملفات power point
ثري وجميل ....

نصائح للعمل بالمنزل لمحترفي تكنولوجيا المعلومات
هذا الموقع

و اخيرا لتعليم sharepoint
من مايكروسوفت

خالص تحياتي وحبي للجميع

الماسنجر ........ خطا فادح بالتجربة

السلام عليكم ورحمة الله وبركاته

كنت بقلب زى مابيقولوا كدة فى دفاترى القديمة ولاقيتنى كنت كاتبة النوت ده
اعتقد انها من الحاجات اللى اتبعتها وماندمتش عليها بعد كدة .... بتتكلم عن تجربة معظمنا مر بيها


الماسنجر زيه زى اى وسيلة اتصال وليه استخدامين يااما صح او غلط عامة اى حاجة بتبقى كدة
الخطا اللى وقعت فيه الحمد لله اتعلمت منه .. احنا كبنات فى كلية عريقة عظيمة زى الحاسبات والمعلومات
لغة المستقبل زى مابيقولوا لا نفقه اى شئ فيها فطبيعى نسال ونتعلم وده فى حدود العلم والادب .
وقت مااجى اتعلم او احاول اعرف الدنيا ماشية ازاى من حواليا تصورت ان الماسنجر ده اسهل حاجة ممكن اسال واستفسر بيها
والتجربة اثبتتلى العكس تمام .... طبيعى لما اى حد بيعوز يسال على حاجة يااما معيد او دكتور او زميل او النت
للاسف عرفت الاخيرة متاخر ماليش خبرة ومعرفش عن النت اكتر من تصفح منتدى وماسنجر فكنت على الماسنجر على طول
المعيدين والدكاترة فى حياتى بصفة عامة مكنش ليا كلام اوى او تعاملات مع اساتذتى على مدار الدراسة مكنتش متعودة انى فى اى وقت كدة ممكن
اروح واتكلم واستفسر لانها كانت حاجات واضحة دروس بتتشرح وخلاص انما فى الكلية لازم تعتمدى على نفسك
تجيبى اللى انتى عاوزاه وده فعلا اللى اكتشفته وخصوصا ان ماليش حد او اخ اعتمد عليهم فى الموضوع ده
من ضمن وسايلى كانت الماسنجر كانت اسهل حاجة .... معيدين ودكاترة احتمالهم معايا كان بسيط فى الاول للاسباب اللى سبق ذكرها

الزملاء بقى البنات كانوا ميح زيي ولما اسال بنت ماتعرفش ..... فسالت بعض الاولاد اللى كنت شايفة انهم ممكن يفيدوا
مش اى حد اساله لا لازم يكون شخص واثقة ان اللى محتاجاه عنده والا كانت هاتبقى سلطة
المعروف ان وقوف بنت وولد فى الجامعة يتكلموا فى اى حاجة اى كانت يبقوا ليهم كلام على النت
قصرت واستفساراتى بقت على النت وخلاص وكانوا معدودين على صوابع الايد الواحدة لانى لما اخترت اللى اسالهم كان عندهم بقيت الاستفسارات
طبعا كانت غلاسة كل مادخل اكلم حد كانت لازم علشان مصلحة ليا ماهو ماعنديش حاجة تانية غيرها اعمل فيها حوارات
وطبعا تطلبى اللى عاوزاه ويتجاوب عليه لكن بقى لما تيجى تنهى المناقشة ساعات مش بتعرفى تنهيها ازاى وبيبقى احراج مابعده احراج

علشان كدة بفضل اللى عاوزاه يكون فى الكلية ماسنجر لا والا بعد ماتخلصى اللى عوزاه هاتدخلى فى استفسارات تانية او حوارات تانية مالهاش اى لازمة
ولو دخلتى فيها تبقى بداية المتاعب .... سمعت راى ان كلام البنات على الماسنجر يتقال عليه خلوة وانه محرم واظن دى لمستها فى الحقيقة واقتنعت بيها جدا
دلوقتى اظن الافضل استفساراتى وتعاملاتى مع اى حد تكون كلها فى الكلية عاوزة حاجة او استفسر عن حاجة اروح واسال سواء لوحدى بقى مش لوحدى
ارحم من النت ومشاكله ...... وفى النهاية مراعاة ربنا سواء على النت او فى الكلية ... عادة اصلا البنات يتحرجوا يساعدوا فى حاجة زى دى اقصد يعنى لو طلبت من بنت تكون واقفة معانا وانا بطلب الحاجة دى قال ايه تتحرج بدون زعل يابنات
وانا مش علشان كدة
اوقف مصالحى او احتياجاتى ولا اقعد على النت علشان ينتهى الامر بحوارات مالهاش لازمة
البنت عامة شخصيتها هى اللى بتحكم تصرفاتها جربت حاجة وطلعت فاشلة مش بتمادى فيها اجرب حل تانى .... الناس كدة كدة بتتكلم اراعى ربنا فى الاول والاخر اى حاجة تانية مش مهمة
لو وقفت استفسر فى حاجة فى الكلية هاكون واللى واقف يجاوب عاوزين ننهى المناقشة ومراعين ان مافيش خلوة ولا حاجة والكل شايف
والادهى انك لو وقفتى تتكلمى فى حاجة تلاقى ناس تانية تقف وتناقش لمجرد فضولهم عاوزين يعرفوا الموضوع
او حتى يمروا من جنبكوا وودانهم معاكم علشان يعرفوا الموضوع ....... اى بنت لما تحب تكلم حد فى مواضيع من وجهة نظرى مالهاش لازمة بتكلمه من غير ماتعمل اى اعتبار لاى حاجة
بالنسبة للبنات كنت سمعت فى برنامج دينى ان الاب لما يقفل على بنته وماتتكلمش مع اى حد ولا تتعامل مع حد يقول عليها بنت محترمة مش بتكلم اولاد
طب وانت ايه عرفك هى جربت هى اتحطت تحت الاختبار تقدر توقف كل شخص عند حده عارفة حدودها ايه؟ الحكم مش بيبقى بانعزال البنت عن اللى حواليها
بالعكس انت ميزت ازاى هى بتعرف حدودها مع الجنس الاخر ولا لا اذا كانت هى اصلا ماتعملتش مع حد ومقفول عليها فرضا ان مر عليها الزمن واضطرت انها تنفتح اكتر على المجتمع حولها هايكون نظامها ايه ........ اكيد تفرق جامد عن البنت اللى بتحافظ على نفسها وراى غيرها فيها وتخلى اى حد لما ييجى يكلمها يفكر مليون مرة الاسلوب والطريقة والموضوع اللى بيتكلم فيه

الموضوع فيه كلام كتير اوى ..... حتى مانسقتش الموضوع اوى
فى امان الله