معلش يمكن هتكلم كتير بس بجد نفسي تقروا الكلام ده لاني بجد عايزاكوا كلكوا تعرفوه
انا غلطت و كنت فاكره نفسي ماشيه صح و فاهمه كل حاجه
قصرت في حاجات و اتهاونت و مكنتش فاهمه انا بعمل كده ليه
و اللي بيغلط لازم يأخد جزاءه عاجلا ام اجلا
و اني اعيد السنه دي قرصة ودن صغيره عشان افوق
الحمد لله على كل حال و لعله خير محدش عارف الخير فين
يمكن ربنا بيديني فرصه اني اصلح الغلط اللي في حياتي و ارجع اقرب منه تاني
و الحمد لله الرؤيا دلوقتي بدأت توضح و ان شاء الله ربنا يقدرني واعمل الصح
و الايام اللي قضيتها هنا كانت احلى ايام قضيتها معاكوا
و الحمد لله اني عرفت ناس كويسين افتخر اني عرفتهم ناس عايزه تشتغل بجد و عايزه تعيش صح
و طلعت ببنات بجد لو مكنتش دخلت هنا عمري ما كنت عرفتهم
بشكركوا على كل حاجه حلوه عشتها هنا و على كل معلومه استفدت بيها منكوا
بجد الحمد لله استفدت كتير و لولا وجود اخواتي جنبي يمكن مكنتش بقيت كده دلوقتي و عرفت اخد القرار الصح
فعلا حسيتها اوي رب اخ لم تلده امك
وكنت فرحانه اوي وانا حاسه انهم خايفين عليه و زعلانين يمكن اكتر مني
انا طبعا دلوقتي مبقتش فرد من الدفعه انا بقيت زائره هنا
بس ان شاء الله مش هسيب البلوج بعد اذنكوا ولا المنتدى و هفضل متبعاهم
بس قبل كده كنت بستنى عشان يمكن اقدر افيد حد في الدراسه
لكن دلوقتي معدش في ايدي حاجه ممكن افيد بيها
و في المجالات التانيه في ناس كتير هنا احسن مني و يعرفوا حاجات انا معرفهاش
ربنا يوفقكوا كلكوا و ينور لكل واحد الطريق الصح اللي يمشي فيه و هوه راضي عنه
و الف مبروك لكل اللي نجحوا و بجد من قلبي فرحانه ليكوا اوي
واللي لسه معرفش نتيجته ربنا يطمنه عليها ان شاء الله
انا اتكلمت كتير بس اخر كلمه عايزه اقولها لاخواتي البنات
يمكن يكون فيه ناس محستش اني بحبها لاني بجد مبعرفش اعبر كويس لكن لازم تعرفوا كلكوا اني بحبكوا و في الاوقات اللي كنت مش بسلم عليكوا فيها كنت بطمن عليكوا من بعيد
وحتى لو بعدت عنكوا و مقدرتش اجي اشوفكوا واسلم عليكوا انا عمري ما هنساكوا
كل ذكرى بينا هتفضل عايشه معايا و مونساني في بعدي ويارب متنسونيش زي ما انا مش هنساكوا
مش معنى كده ان لو حد شافني ميسلمش عليه لا طبعا هنسلم على بعض
وان شاء الله هبقى اجي اغلس عليكوا شويه ما انا هبقى فاضيه بقى املى الفراغ اللي هيبقى موجود :)
سلام يا أحلى دفعه
I will miss all of you
_____________
Wild Flower
