السلام عليكم ورحمه الله وبركاته
طبعا ده اول بوست ليا هنا
وبجد هو غريب جدا
بس الموضوع ده شاغل بالى بطريقه صعبه
ومش عشان احنا بنات يبقه مش حاسين بغيرنا
المهم
دلوقتى كان الله فى عون الرجاله ليه ؟
اكيد ده سؤال بتسالوا
انا من وجهة نظرى انهم عليهم حمل كبير جدا
ودول الرجاله اللى شايلين مسؤليه مش اى رجاله
يعنى مثلا طالب فى الجامعه هيتخرج مثلا وهو عنده 21 سنه
الله اعلم هيدخل الجيش ولا لا
ولو دخل (انا معرفش مدة الجيش قد ايه )
بس مثلا هنقول سنتين
يبقه كده عنده 23 سنه
يطلع بقه لسه يدور على شغل
ويكون مستقبله
عشان يجيب شقه وشبكه ومهر
ويعمل فرح
ويتجوز
كل ده هيكون فى كام سنه وبالاسعار اللى احنا فيها دى هنقول مثلا 5 سنين
يبقه عنده 28 سنه
ده معدل لو يعنى الحياه حلوه وهيلاقى شغل والبنت اللى هيتجوزها اهلها هيكونوا ناس كويسين وهيطلبوا حاجه معقوله
ولو مثلا عنده شقه وبس هيشطبها
معرفش حاسه انهم صعبنين عليا
يمكن عشان اخواتى كلهم ولاد وبشوف هما بيعملوا ايه عشان يكونه نفسهم
ولا عشان اللى بشوفه فى الواقع والدراما برده الشباب اللى بيموت وهو مسافر عشان يجيب فلوس
بجد حاجه تقطع القلب
بس اكيد مش هنبكى على الاطلال
ونقول الكلام ده وهما ما هيصدقوا
لا انا بجد بقول مجرد نصيحه بقولها دايما لاى حد اعرفه اخواتى يعنى واى حد من اهلى
ان مش شرط انك تشتغل فى تخصصك (لان لو انتظرت التخصص بتاعك يبقه هتجوز بعد 10 سنين)ده القاعده واكيد فى شواذ
اولا فتره الاجازه دى مش يضيعها فى الراحه فى البيت واللعب الفاضى
هيقول احنا بنعمل فى تخصصنا (احنا قولنا ايه من شويه محدش ضامن التخصص تفضل 4 سنين شغال فى تخصصك على امل شغل بعد التخرج وفى الاخر ايه صابونه)
امال نعمل ايه فى الاجازه
اشتغل شغل يجيب فلوس ابدا من دلوقتى كون نفسك فى ناس بدات تكون نفسها من ثانوى اتعود على الشغل اعرف فى كل حاجه مش تقتصر على حاجه واحده بس
ازى انت لغايه دلوقتى بتاخد المصروف من بابا بجد حاجه تكسف
بس للناس التانيه
والله بشوف طلابه خرجين هندسه وطب وربنا شاغلين على توك توك وتاكسيات انت احسن منهم فى ايه وفى مصر مش هقول بره لاننا عارفين بره هما بيعملوا ايه وعادى عندهم ومش بيتكسفوا انهم بيشتغلواكده (لانهم بيفكروا صح)
ولو عاوز تمرن نفسك فى تخصصك فى ايام دراسه اكيد مش ليل ونهار قاعد تذاكر اكيد لا يبقه
طول ايام الدراسه طور نفسك والاجازه هات فلوس
اتعود على الشغل
عشان محدش عارفه ايه اللى هيحصل بكره
البوست ده غريب
نصه هما صعبنين عليا
والنص التانى نصيحه
واصلا معرفش انا ليه كتبته مع اننا كلنا بنات بس اكيد كل بيت واحده فينا ليها اخ لازم تنصحه وبرده فى نفس الوقت تحس بيه
بس بجد اليومين اللى فاتوا اول مره احس اوى ان الشباب بيتعذب ومفيش حاجه بتيجى بالسهل الشباب اللى بيعتمد على نفسه
مش اللى بيعتمد على اهله
كل اللى بقوله ان الناس تفكر بواقعيه ومش ترتبط بحاجه معينه وتبدا تكون نفسها وتسيبها من الغفله اللى هى فيها
والاهل يرحموا نفسهم شويه فى الطلبات انتم بردوا عندكم اولاد وهيتعمل فيهم زى ما بتعملوا فى ولاد الناس
يلا كفايه كده
وبجد سورى جدا على الاطاله
كل سنه وانتم طيبين
$نـــــــــور القلب$
7 comments:
ايه ده عاوزانا نقعد ف البيت ومنفكرش ف الشغل انا موافقه بس كمان يمنعوا التعليم للبنات بالمرة D:
بس كلامك مظبوط جداا لازم كل حد يعرف كل حاجه ويشتغل كل حاجه مينتظرش الشهادة وانه يشتغل بيها بس
اغلب الناس تفكيرها كده
بوست جميل ياايمى
//والبنات يقعدوا بقه شويه فى البيت يسبوا فرصه للشباب فى الشغل //
بصى يا نور القلب يصعبوا عليكى اوكى مفيهاش حاجة اهالى البنات المفروض يتهاونوا شوية فى الطلبات ماشى بردو ده شئ طبيعى انما الكلام العجيب اللى بتقوليه ده لو مشينا بنفس المبدا بئه ناقص تقولى البنات يقعدوا من التعليم يوفروا فرص للشباب تتعلم البنات متخرجش للشارع عشان يوفروا مكان للشباب يمشوا فيه مش فاهمة ايه المنطق بئه من انك تفضلى تتعلمى 16 سنة والاخر تقولى نوفر للشباب وبعدين الشغل بيعتمد على الكفاءة يعنى تكون بنت احسن من شاب فى مجال معين وتقولى لا الشاب عشان نوفر فرصة له ده يا عينى محتاج وعليه مسؤوليه اوكى عليه مسؤوليه انما قصادها مميزات كتير جدا مش عند البنات مش هتقعد فى البيت كمان وتلغى نفسها عشان توفر فرصة لحد تانى
واسفة لو اسلوبى حاد شوية بس بجد جملتلك دى نرفزتنى جدا
ايه يا جماعه فى ايه
انا بتكلم فى موضوع وانتم اتكلمتوا فى موضوع تانى خالص
انا ليا وجهة نظر فى عمل المراه(واتكلمت فيها قبل كده على المنتدى) وانا عن نفسى مش عارفه لسه هعمل ايه اه مش عاوزه اشتغل بس محدش عارفه هيحصل ايه بكره
وبالنسبه للتعليم
لا مستحيل طبعا البنت تبطل تعليم
لان التعليم ده بينمى عقلها ومفيد ليها فى حاجات كتير مش شرط العمل
وعلى العموم انا عامله الموضوع ده لهدف معين مش عاوزه يتوجه لمسار تانى
وهحذف الجمله دى حالا
واكيد يا صفا
مش هرضى اننا نتنازل عن كل حقوقا كده عشان فرصه لشباب انا بتكلم فى نقطه معينه بس
يلا يا قمرات ط ت ت
وسورى لو كنت نرفزت حد بوجهة نظرى مجرد وجهة نظر
سلام
اهلا يا ايمان
ازيك ...
بس هوه فيه حاجة عايزة اوضحها
ان الخريج الجامعي جيشه حوالي 9شهور
السنتين دول للي مش مكمل تعليمه الجامعي ...وحاجة كمان انا من المعتقدين بتعدد الادوار
وباتساع مجالات الحياة .
يعني البنات يشتغلو او يقعدو في البيت
مش هيه دي اللي ها توقف الدنيا
وشكرا على البوست الجميل
احنا كاتبين فى البلوج ايه
//We Are Some Girls With Different Thoughts In Different Things.
//
يعنى حاجه طبيعيه يعنى ان كل واحده فينا ليها رأى بس الحمد لله كلنا متجمعين فى مكان واحد اهو ومن غير نرفزه :D
_____
المهم بقى موضوعك يا ايمى
رأى الشخصى طبعا مع احترامى لكلامك الولاد عارفين كل الكلام ده كويس
يعنى مش محتاجين نصيحه من حد هما كل اللى محتاجينه هما عارفيه كويس انتى لو فضلتى تنصحى من هنا للسنه الجايه مش بيأثر الولاد مفيش حد بيسيطر عليهم غير نفسهم وده بيبقى هدايه من ربنا والحمد لله
انا عندى اخويا الصغير فى اولى كليه هو وكل اصحابه اللى فى سنه واللى اصغر منه واكبر منه بيشتغلوا مش مهم فى ايه؟ بس الحمد لله بيشتغلوا وشايلين المسؤليه
ودول طبعا نموذج من نماذج الشباب اللى بتتكلمى عنهم
يعنى من النهايه الانسان اللى مش بيشتغل ده ولا بيدور على نفسه هو اللى عايز كده ماهو ممكن لو عايز هايشتغل اى حاجه زيه زى غيره لكن هو اللى عايش فى دور الاكتئاب والسلبيه ومش عايز يسيبها
ربنا يهدى الجميع
______
وبالنسبه لشغل البنات فانهايه الموضوع ده الشرع قالها البنت تشتغل لو هى وعيلتها محتاجه لكن لو جوزها طبعا مش موافق فاقعدتها احسن وافضل طبعا
وبرضن من رأى لو فيه اطفال يبقى برضه عدم شغلها افضل بكتير لان تربيه اولادها هى دى اكبر واحسن مهمه تقوم بيها
___________
وربنا يهدى الجميع سواء البنات او الولاد او الاهل
وسلام يا جميل :)
معاكى ياامانى فى كل اللى انتى بتقوليه
لكن كون ان البنات تقعد وتسيب شغلها للولاد او الفرصة دى ........ معلش صاحب الشغل لو مش لاقى البنت دى فيها المؤهلات الكافية للوظيفة اكتر من الولد ياخدها ليه .... ليه الولد مايطورش نفسه ويكون اعلى منها فى المؤهلات
زى مابتقولى فى فعلا ولاد بيشتغلوا من دلوقتى وبيتعبوا ..... ده الطبيعى واللى لازم يعملوه اومال لو ماشتغلوش مستنين حد يشتغلهم الموضوع فى الاول والاخر راجع لهم عاوز تكون نفسك اشتغل مش عاوز بقى دى حاجة تانية ...... معاكى العيشة صعبة لكن بردو لكن مجتهد نصيب ......... وشكرا على البوست الرائع ياايمان ^_^
بجد بموت فيكى يا مياده ده اللى كنت عاوزه اقوله بالظبط وقولت وربنا فى موضوع منفصل قبل كده
_________
وبالنسبه لشغل البنات فانهايه الموضوع ده الشرع قالها البنت تشتغل لو هى وعيلتها محتاجه لكن لو جوزها طبعا مش موافق فاقعدتها احسن وافضل طبعا
وبرضن من رأى لو فيه اطفال يبقى برضه عدم شغلها افضل بكتير لان تربيه اولادها هى دى اكبر واحسن مهمه تقوم بيها
______________________________
ويا جماعه انا مسحت الجمله خلاص لان انا هدفى هنا مش عمل المراه
اناهدفى هنا اللى بيحصل للشباب
اه فى ناس سلبيه
ودول مش بوجه ليهم النصيحه
انا قولت فى البوست انا بوجه النصيحه للشباب اللى شايل مسؤليه
بس
وبجد فى شباب من دول بيعمل بيعمل بس فى مجاله وفى الاخر يجى يلاقى شغل طبعا مفيش
ويزعل بقه ويكتئب ويقول انا عملت كل اللى عليا
عشان كده بوجه نصيحه من دلوقتى لناس جربت قبلهم يلحقوا نفسهم من دلوقتى
وميرسى يا قمرات على مروركم
وعلى راى مياده احنا هنا بنات بس كل واحده مختلفه فى رايها ودى حلوه الموضوع
فكر مختلف
فى النهايه فى كام جمله عاوزه اعلق عليهم بس لسه صاحيه بقه ومش فاضيه فى وقتا لاحق ان شاء الله
سلام
إرسال تعليق